_______________________________________________________________________

Mir schaun de Leit aufs Mei

Kriag im Intanet

I bin fuchsdeifeswuid. So gärgart hot mi scho lang nix mehr ois wia da Virus, der unsa gesamte PC-Welt lahm glegt hot. Es is ja net nur dass erst neilich as Telefon mitsamtm Intanet ausgfoin is, sondan jiatzt is mit dem BKA Virus ois hi. Tatsächlich bin i aufm Kriagspfad, denn dös is nimma normal, und bei da Krippo homs zwar scho an Gegenvirus aufgruafa, oba dös huift uns aa nix mehr. Und da Polizist, der lacht und moant, na ja füar d'Statistik kennas a Anzeige aufgehm. De Täta oba bleibm im Hintagrund. Nun kriag i scho an Wahn weil i mir denk, hier is a so a Schmutzfink am Werk, der den Anschlog speziell auf mi geplant hot, doch dabei geht dös net auf mei Adress. Man fangt o, olle möglichn Zuweisunga se auszumdenka. Es kannt ja mit da Post vo de Gentechnikgegna kumma, denn dös war de letzte Meldung im Intanet. Vielleicht hot do oana a Interesse dem besagten Kreis oans auszumwischn. Olle Bekannten lachan und moana; wo sörfst du ois umananda? Doch dös macht mi erst recht narrisch. Denn i hob nix gmacht und trotzdem kummt dieser bleede Virus üba mi. Da Melcher-Sepp moant glei gor: „Weg mit dem ganzen PC-Scheiß. Mir kenna aa unsare Ochsn mit da Kartn obmeldn wia früaha.“
Natürlich lacha olle Bekanntn, wenn ma davo erzählt, weil ma dann zum Schodn an Spott aa no hot. Mittlaweile hom mir uns informiert. Dös hot soiche Ausmaße ognumma, dass ganze Nationa sich gegenseitig per Virus kaputt macha. Zwischen de Israelis und de Palästinäsa gibt’s an richtign Kriag im Intanet. De häckn se gegnseitig d'Firmen kaputt. Natürlich is so wos bessa, ois wenn Menschn zuschodn kumma, und oa Bekannte moant glei gor, „dös is de beste Kriegsführung übahaupt.“ Und es kenna se de Gscheitesten vo dem jeweilign Land profiliern. Kriag da Köpfe. Doch so oafach is dös net. Denn ganze Wirtschaftn san vom Intanet mittlaweile abhängig, aa da Melcher-Sepp mit seine Ochsen, und i woaß wia eahm dös wurmt, und mi machtz genauso fuchsig, de Frechheit mit der de in mein Computer eidringa und mi vielleicht aa no ausspioniern. Für 200 Euro hot da Computer-Doktor dann den PC wieda gangig gmacht, oba olle Datn san verlorn. Na oiso es geht ja – es kost hoit bloß net nur Nerven!
_________________________________________________________________