_______________________________________________________________________

Mir schaun de Leit aufs Mei

Telefonstreiche

„I find mei Telefon nimma!“ Dös ewige Thema, wenn mir mit unsam Onkel Erich telefoniern. Mir wissn net, wia vui Telefone der mittlaweile rumliegn hot, und koans geht oda is grod net parat, wenn er telefoniern wui. Jedenfois dös oane geht, zwar schlecht, weil er koan guadn Empfang hot, oba er kon zumindest in dös oane no neischimpfa. Er is auf da Suche nach dem Festnetztelefon, wo doch de Telefongesellschaft (de bestimmt so einiges vo eahm ohörn muass) versichart hot, es geht jiatzt wieda. Oiso erklärn mir eahm, dass mir vo uns aus sei verlustigs Telefon oruafa und er hoit schaugn muass, dass er’s klingln hört. „Mach olle Türn auf und horch!“ Doch mit seine 77 Johr hört er hoit aa nimma so guad. Oiso da erste Versuch, da zwoate, zwischendurch an da andan Leitung: „Hörst as!“ „Ja i glaub i hör’s – es is in da Küch!“ Oiso weita, weil nach fünf Moi klingeln de Ansage kummt und ois verpatzt. „Hauptsach es is do, dös beruhigt mi scho!“ erklärt uns da Onkel. Dös reicht oba no net, erklärn mir, und probiern’s weita. Jiatzt fangt da Hund zum belln o. Es reicht eahm nämlich! Da ganze Zirkus geht jiatzt scho bestimmt a hoibe Stund. Und mir frogn imma wieda noch: „Host as gfundn?“ Es is wia bei de Kinder, de Telefonstreiche macha, nur is dös bei de oidn Leit net so lustig, wenn oam as Telefon an Streich spuit. Nexte Meldung: „I hör’s ganz deitlich, wenn da Hund nur amoi mitm Belln aufhörn dat, der hot se nämlich jiatzt in das Geschehen eigschoitn und bellt, wos as Zeig hoit. – Mir gehm’s auf, weil mir uns aa dös Geschimpfe auf de bösn Telefongesellschaftn nimma ohörn kehna.
Zehn Minutn späta: „I hob’s gfundn, es is in da Eckbank drin gwen, do wo da Hund ollawei draufliegt, und es hot eahm woih aufgschreckt, deswegn is er gar so bled de letztn Tog. Weil’s eahm untam Oasch oiwei gleit hot. Und i hob scho denkt, der spinnt jiatzt komplett, unsa Kläffa!“ Mir warn vom guadn Zuaredn völlig erschöpft, und da Nachmittog war a scho fast rum. Drum soitat ma gelassener wern, je älta ma werd, und se net üba ois aufregn. – Früha hot er Weiber gsammelt, heit steht er offenbar auf Telefone, da guade Onkl – so ändan sich de Zeitn!
_________________________________________________________________